‘‘กิเลสา ฌาปิตา มยฺหํ…เป.… วิหรามิ อนาสโวฯ
[42]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[43]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กุฏชปุปฺผิโย เถโร อิมา คาถาโย
อภาสิตฺถาติฯ
กุฏชปุปฺผิยตฺเถรสฺสาปทานํ สตฺตมํฯ
8. โฆสสญฺญกตฺเถรอปทานํ
[44]
‘‘มิคลุทฺโท ปุเร อาสิํ, อรญฺเญ วิปิเน อหํ;
อทฺทสํ วิรชํ พุทฺธํ, เทวสงฺฆปุรกฺขตํฯ
[45]
‘‘จตุสจฺจํ ปกาเสนฺตํ, เทเสนฺตํ อมตํ ปทํ;
อสฺโสสิํ มธุรํ ธมฺมํ, สิขิโน โลกพนฺธุโนฯ
[46]
‘‘โฆเส จิตฺตํ ปสาเทสิํ, อสมปฺปฏิปุคฺคเล;
ตตฺถ จิตฺตํ ปสาเทตฺวา, อุตฺตริํ [อตริํ (สี. ปี.)] ทุตฺตรํ ภวํฯ
[47]
‘‘เอกติํเส อิโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, โฆสสญฺญายิทํ ผลํฯ
[48]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[49]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[50]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โฆสสญฺญโก เถโร อิมา คาถาโย
อภาสิตฺถาติฯ
โฆสสญฺญกตฺเถรสฺสาปทานํ อฏฺฐมํฯ
9. สพฺพผลทายกตฺเถรอปทานํ
[51]
‘‘วรุโณ นาม นาเมน, พฺราหฺมโณ มนฺตปารคู;
ฉฑฺเฑตฺวา ทสปุตฺตานิ, วนมชฺโฌคหิํ ตทาฯ
[52]
‘‘อสฺสมํ สุกตํ กตฺวา, สุวิภตฺตํ มโนรมํ;
ปณฺณสาลํ กริตฺวาน, วสามิ วิปิเน อหํฯ
[53]
‘‘ปทุมุตฺตโร โลกวิทู, อาหุตีนํ ปฏิคฺคโห;
มมุทฺธริตุกาโม โส, อาคจฺฉิ มม อสฺสมํฯ
[54]
‘‘ยาวตา วนสณฺฑมฺหิ, โอภาโส วิปุโล อหุ;
พุทฺธสฺส อานุภาเวน, ปชฺชลี วิปินํ ตทาฯ
[55]
‘‘ทิสฺวาน ตํ ปาฏิหีรํ, พุทฺธเสฏฺฐสฺส ตาทิโน;
ปตฺตปุฏํ คเหตฺวาน, ผเลน ปูชยิํ อหํฯ
[56]
‘‘อุปคนฺตฺวาน สมฺพุทฺธํ, สหขาริมทาสหํ;
อนุกมฺปาย เม พุทฺโธ, อิทํ วจนมพฺรวิฯ
[57]
‘ขาริภารํ คเหตฺวาน, ปจฺฉโต เอหิ เม ตุวํ;
ปริภุตฺเต จ สงฺฆมฺหิ, ปุญฺญํ ตว ภวิสฺสติ’ฯ
[58]
‘‘ปุฏกนฺตํ คเหตฺวาน, ภิกฺขุสงฺฆสฺสทาสหํ;
ตตฺถ จิตฺตํ ปสาเทตฺวา, ตุสิตํ อุปปชฺชหํฯ
[59]
‘‘ตตฺถ ทิพฺเพหิ นจฺเจหิ, คีเตหิ วาทิเตหิ จ;
ปุญฺญกมฺเมน สํยุตฺตํ, อนุโภมิ สทา สุขํฯ
[60]
‘‘ยํ ยํ โยนุปปชฺชามิ, เทวตฺตํ อถ มานุสํ;
โภเค เม อูนตา นตฺถิ, ผลทานสฺสิทํ ผลํฯ
[61]
‘‘ยาวตา จตุโร ทีปา, สสมุทฺทา สปพฺพตา;
ผลํ พุทฺธสฺส ทตฺวาน, อิสฺสรํ การยามหํฯ
[62]
‘‘ยาวตา เม ปกฺขิคณา, อากาเส อุปฺปตนฺติ เจ;
เตปิ มํ วสมนฺเวนฺติ, ผลทานสฺสิทํ ผลํฯ
[63]
‘‘ยาวตา วนสณฺฑมฺหิ, ยกฺขา ภูตา จ รกฺขสา;
กุมฺภณฺฑา ครุฬา จาปิ, ปาริจริยํ อุเปนฺติ เมฯ
[64]
‘‘กุมฺภา โสณา มธุการา, ฑํสา จ มกสา อุโภ;
เตปิ มํ วสมนฺเวนฺติ, ผลทานสฺสิทํ ผลํฯ
[65]
‘‘สุปณฺณา นาม สกุณา, ปกฺขิชาตา มหพฺพลา;
เตปิ มํ สรณํ ยนฺติ, ผลทานสฺสิทํ ผลํฯ
[66]
‘‘เยปิ ทีฆายุกา นาคา, อิทฺธิมนฺโต มหายสา;
เตปิ มํ วสมนฺเวนฺติ, ผลทานสฺสิทํ ผลํฯ
[67]
‘‘สีหา พฺยคฺฆา จ ทีปี จ, อจฺฉโกกตรจฺฉกา;
เตปิ มํ วสมนฺเวนฺติ, ผลทานสฺสิทํ ผลํฯ
[68]
‘‘โอสธีติณวาสี จ, เย จ อากาสวาสิโน;
สพฺเพ มํ สรณํ ยนฺติ, ผลทานสฺสิทํ ผลํฯ
[69]
‘‘สุทุทฺทสํ สุนิปุณํ, คมฺภีรํ สุปฺปกาสิตํ;
ผสฺสยิตฺวา [ผุสยิตฺวา (ก.)] วิหรามิ, ผลทานสฺสิทํ ผลํฯ
[70]
‘‘วิโมกฺเข อฏฺฐ ผุสิตฺวา, วิหรามิ อนาสโว;
อาตาปี นิปโก จาหํ, ผลทานสฺสิทํ ผลํฯ
[71]
‘‘เย ผลฏฺฐา พุทฺธปุตฺตา, ขีณโทสา มหายสา;
อหมญฺญตโร เตสํ, ผลทานสฺสิทํ ผลํฯ
[72]
‘‘อภิญฺญาปารมิํ คนฺตฺวา, สุกฺกมูเลน โจทิโต;
สพฺพาสเว ปริญฺญาย, วิหรามิ อนาสโวฯ
[73]
‘‘เตวิชฺชา อิทฺธิปตฺตา จ, พุทฺธปุตฺตา มหายสา;
ทิพฺพโสตสมาปนฺนา, เตสํ อญฺญตโร อหํฯ
[74]
‘‘สตสหสฺสิโต กปฺเป, ยํ ผลํ อททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[75]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[76]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[77]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สพฺพผลทายโก เถโร อิมา คาถาโย
อภาสิตฺถาติฯ
สพฺพผลทายกตฺเถรสฺสาปทานํ นวมํฯ
10. ปทุมธาริกตฺเถรอปทานํ
[78]
‘‘หิมวนฺตสฺสาวิทูเร , โรมโส นาม ปพฺพโต;
พุทฺโธปิ สมฺภโว นาม, อพฺโภกาเส วสี ตทาฯ
[79]
‘‘ภวนา นิกฺขมิตฺวาน, ปทุมํ ธารยิํ อหํ;
เอกาหํ ธารยิตฺวาน, ภวนํ ปุนราคมิํฯ
[80]
‘‘เอกติํเส อิโต กปฺเป, ยํ พุทฺธมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[81]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[82]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[83]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปทุมธาริโก เถโร อิมา คาถาโย
อภาสิตฺถาติฯ
ปทุมธาริกตฺเถรสฺสาปทานํ ทสมํฯ
ผลทายกวคฺโค ทฺเวปญฺญาสโมฯ
ตสฺสุทฺทานํ –
กุรญฺจิยํ กปิตฺถญฺจ, โกสมฺพมถ เกตกํ;
นาคปุปฺผชฺชุนญฺเจว, กุฏชี โฆสสญฺญโกฯ
เถโร จ สพฺพผลโท, ตถา ปทุมธาริโก;
อสีติ เจตฺถ คาถาโย, ติสฺโส คาถา ตทุตฺตริฯ
53. ติณทายกวคฺโค